TIMU ZA WATUMISHI MUFINDI ZAANZA MAZOEZI ILI KUSHIRIKI BONANZA LA AMANI,

      

Timu za michezo mbalimbali zinazoundwa na wataumishi wa Halmashauri ya Wilaya ya Mufindi ya Mkoani Iringa, zimeanza kujifua tayari kwa kushiriki Bonanza la siku mbili ambapo watumishi wa Halmashauri zote za Mkoani Iringa sanjali na wale wa Makapuni binafsi watashindana katika michezo mbalimbali kwa lengo la kuadhimisha siku ya amani duniani ambayo huadhimishwa kila ifikapo tarehe 21 ya mwezi wa 09.

Ofisa habari na Mawasiliano wa Halmashauri ya wilaya ya Mufindi Ndimmyake Mpokigwa  Mwakapiso amesema, bonanza hilo litaanza tarehe 20 mpaka 21 mwezi huu na kufanyika katika viwanja vya chuo Kikuu cha Mkwawa ambapo watumishi watashindana katika michezo ipatayo 07 ikijumuisha, Mpira wa Miguu, Mpira wa pete, Mchezo wa mbio za kwenye magunia kwa wanawake na wanaume, Mchezo wa kuvuta kamba kwa wanawake na wanaume.

 Michezo mingine ni  kufukuza kuku kwa wanawake na wanaume,   Mchezo wa kuchukua chungwa kwa mdomo katika maji kwa wanawake na wanaume na Mchezo wa  riadha  mita 100 kwa wanawake na wanaume.

Akizungumzia maandalizi ya ushiriki wa Wilaya ya Mufindi Mwakapiso ametanabaisha kuwa maandalizi ya kushiriki mashindano hayo yanaendelea vizuri na jumla ya wanamichezo 30 watakao onesha uwezo kupitia mazoezi hayo watachaguliwa kuiwakilisha Wilaya ya Mufindi katika michezo itakayoshindaniwa.